2021 թ․-ի փետրվարին Կովկասի ինստիտուտը` ՄԱԿ-ի Զարգացման ծրագրի պատվերով փորձնական ուսումնասիրություն է իրականացրել Գորիսում՝ Հայաստանի Սյունիքի մարզի խոշորացված սահմանամերձ համայնքում։ Ուսումնասիրության նպատակն էր բացահայտել համայնքի հիմնական խոցելի կողմերը և ամրապնդել համայնքի կայունությունն ու անվտանգությունը հետկորոնավիրուսային իրականության պայմաններում:
Ուսումնասիրությունը կատարվել է Կովկասի ինստիտուտի կողմից ՄԱԿ-ի Զարգացման ծրագրի համար 2020թ․ օգոստոս-սեպտեմբեր ամիսներին Սյունիքի մարզի Սիսիան և Վայոց ձորի մարզի Արենի համայնքներում կատարված փորձնական ուսումնասիրությունների արդյունքներն ու փորձառությունը հաշվի առնելով։
Համայնքի կայունության և երկարաժամկետ զարգացման սույն սցենարը ամփոփում է հետազոտության արդյունքները և ներկայացնում է առաջարկություններ Գորիս համայնքի դիմադրողականության բարձրացման ուղղությամբ:
Սցենարը հիմնվում է այն նորարարության և նախաձեռնողականության ոգու վրա, որը գոյություն ունի Գորիս համայնքում՝ անկախ նոր մարտահրավերներից։
Այն կենտրոնանում է համայնքի երկու հիմնական զարգացման ուղղությունների վերափոխման վրա՝ հետևյալ միջոցներով. (1) անցում մեծ տարածքների օգտագործմամբ գյուղատնտեսական գործունեության տարածված և հնացած պրակտիկայից դեպի առավել ինտենսիվ գյուղատնտեսություն՝ հողի, ջրի և էներգիայի մինիմալ օգտագործմամբ և (2) զբոսաշրջության ոլորտում նոր, ստեղծագործական մոտեցումների ներդրում, հիմնականում ագրոտուրիզմի և ընտանեկան ոճի հյուրընկալության՝ շեշտադրում կատարելով համայնքի ինքնատիպ պատմական ու բնական առանձնահատկությունների վրա։